2017tik 2019ra bitartean egindako 24 koadro bildu ditu Xanti Esnaola Urkizuk Zizurkilen jarri duen erakusketan. Paisaiak dira gehienak eta bada bat propio okasio honetarako prestatu duena: Zizurkilgo herrigunea erakusten duen koadroa da.
Betidanik margotu izan du Esnaolak, baina erretiroa hartzeko ordua iritsi zitzaionean berriz heldu zion afizioari. Catalina Erauso arte elkartean aritu izan da eta etxean pintatzen du bestela. «Akrilikoarekin hasi nintzen eta orain akuarela erabiltzen dut koadroak pintatzeko».
Oinarrian beti izaten du argazkiren bat: «Gustuko dudan argazkiren bat topatzen badut hura hartzen dut pintatzeko oinarri. Ahalik eta antzekoen egiten saiatzen naiz, baina badago koadroren bat, konposizio aldatuta daukana, elementuak lekuz mugitu ditut horretarako». Liburuetatik hartutako argazkiak, Interneten bilatutakoak edota atzerrian oporretan dauden lagunek bidalitakoak erabili izan ditu pintatzeko. Gehienak gertuko paisaiak dira, ordea; Alegia, Zerain, Tolosako San Blas auzoa edota Txindoki ageri diren koadroak ikusi daitezke erakusketan.
Koadroak sinatzeko bere bigarren abizenaren laburdura erabiltzen du eta ondoan jartzen dio margolana egin dueneko urtea. Duela urtebete inguru Alegian erakusgai jarri zituen bere lanak eta Plazida Otaño liburutegikoa du bigarren erakusketa. Azaroaren 29ra bitartean izango da ikusgai, astelehenetik ostiralera 10:00etatik 13:00etara eta 16:00etatik 20:00etara, eta larunbatetan, berriz, 09:30etik 13:30era.