Elbarrenako jaiak hasteko aste bat baino gehiago falta da, baina, motorrak berotzen joateko, ekitaldiak antolatu dituzte asteburu honetarako. Larunbatean, abuztuaren 31n, emakumeen errugbi eguna ospatuko dute, eta egunari hasiera emateko II. Melokotoi Txapelketa antolatu dute.
Aurten parte hartuko duten taldeak honakoak izango dira: Bera Bera, Hernani La Unica eta Ordizi. Partidak Danenaren zelaian jokatuko dira, 12:00etan hasita. Partidak amaituagatik, hirugarren denbora ez dute jokatu gabe utziko, eta horretarako, bazkaria antolatu dute Joxe Arregi plazan. Bazkari irekia izango da eta edonork eman dezake izena. Apuntatzeko azken eguna bihar izango da, eta Atxulondon edo Egarrin eman daiteke izena. Iluntzean, 19:30ak aldera, The hastelen's taldearen kontzertua izango dute.
Igandeko ekitaldiak
Irailaren 1erako ere ekitaldiak antolatu ditu Zizurkilgo Udalak; egun horretan, II. Zizukilgo kotxe eta motor klasikoen topaketa ospatuko dute:
08:30-09:30. Kotxe eta motorren etorrera.
09:45-11:00. Motorren igoera kronometratua Fraisorora (tanbordun motorrak).
11:30-12:45. Kotxe eta motorren ibilaldia Aiztondotik barrena.
13:00. Motorren azelerazio froga (30 urtetik gorako guztiek).
14:30. Bazkaria Joxe Arregi plazan.
17:00. Kontzertua.
Jarraian. DJa.