Herriko belaunaldi berriei festaren harra sartzeko eguna dute, gaur, Zizurkilgo Herrigunean. Krosarekin ekin diote egitarauari eta, gehienak itzalaren bila aritu badira ere, eguzki betean osatu behar izan dituzte lasterketak.
Belazean ibilbidea argi markatuta bazegoen ere, aurkezleak behin eta berriro ohartarazi ditu korrikalariak: "Kontuz sator zuloekin!". Baina, lasterkari trebeentzat ez da sator zulorik, eta Haur Hezkuntzako mailako neska-mutiletatik hasi eta DBHko parte hartzaileetaraino, airoso osatu dituzte korrikako lehiak.
Ez da gutxiagorako, Aitziber Ibarbia korrikalaria izan baitute laguntzaile, eta lehen itzuli guztiak osatu ditu korrikalariekin; gurasoen txanda inprobisatuan ere gidari aritu da Ibarbia.
Haurren eguneko kroseko parte hartzea gora doa, urtez urte, eta aurten 53k eman dute izena.