Julen Gabirondok irabazi du azkartasuna eta txukuntasuna kontuan hartzen dituen sega txapelketa. Lehen kanporaketan bera izan da azkarrena 100 metro karratuko sailean. Penalizazioak penalizazio, saila azkarrena berak moztu du. Iban Pardo sailkatu da bigarren, Mikel Lizartza tolosarraren eta Suharri Irazustabarrenaren aurretik. Horiek izan dira finalera pasa diren lau segalariak. Kanpoan, Arkaitz Arteaga baliarraindarra hiru segundora geratu da. Jon Otegi gaztea, Peio Argaia zizurkildarra eta Joakin Garmendia anoetarra ere ez dira finalera pasa. Azpimarratzekoa azken honek 74 urterekin txapelketan parte hartu izana.
Finalean beste horrenbesteko lana zuten, eta oraingoan, saila mozten azkarrena Iban Pardo izan da. Penalizazioak aurka izan ditu ordea sasoi bikaina erakutsi duen Pardok. Segundo gutxira bukatu du Gabirondok, eta txukuntasunari esker, buelta eman dio denborari txapela jantziz. Mikel Lizartza izan da hirugarren amaitu duena. Tolosarra bikain ibili da, belarra dotore mozten duela erakutsiz. Irazustabarrena sailkatu da laugarren.
Sari banaketa ekitaldian Andoni Goikoetxea eta Aitor Esnaola gogoan izan dituzte. Bi segalariak espetxean dituzte, baina sega mundua alboan dutela.