Saihesbidea egiteko konpromiso formala eskatu diote Gipuzkoako Foru Aldundiari

Tolosaldeko Ataria 2019ko eka. 26a, 19:12

Zizurkilen dozenaka herritar kalera irten dira manifestazioan gaur arratsaldean. Diputazioari behin betiko erabakia har dezan eskatu diote.

Zizurkilen saihesbidearen aldeko manifestazioa egin dute gaur arratsaldean herritarrek. Trafiko arazo latza daukatela azaldu dute, eta konpromiso formalak eskatu dituzte:"Foru aldundiak urte mordoa darama gaia aztertzen, eta behin betiko erabaki bat hartzeko eskatzen diogu, arazo hau konpontzeko benetako beharra baitaukagu". Diputazioa larritasunaren jakitun dela azaldu dute manifestariek, "eta badaki saihesbidea behar beharrezkoa dela gure herriarentzat, horregatik eskatzen diogu lehentasuna ematea gai honi eta saihesbidea egiteko konpromiso formala hartzea. Hori lortu arte lanean jarraituko dugu".

Elbarrena erdigunetik egunero 10.000 ibilgailu inguru pasatzen dira manifestariek zabaldutako datuen arabera. Horrek egunerokotasunean izugarrizko eragozpenak sortzen dizkietela azaldu dute. "Gainera, legediak ezarritako soinu mugak gainditzeaz gain, kutsadura eta osasun arazoak ekar ditzake", gaineratu dute.

Manifestazioa deitu duten herritarrek eskerrak eman nahi izan dizkie Zizurkilgo Udal ordezkariei, "oraingoan ere euren atxikimendua eman digutelako eta espero dugu legealdi berrian ere elkarlanean jarraitzea". Arratsaldeko manifestazioan udal ordezkariak bertan izan dira, Iker Urruzola alkatea buru zela.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!