Opor egunetarako programazioa prestatu du Gaztezulok

Atxulondo kultur etxearen behebarruan kokatuta dago Zizurkilgo Gaztezulo, duela lau urtetik hona. Maite Amenabar alkateordeak eta Ane Artutxa hezitzaileak azken asteetan bertan egin dituzten berrikuntza lanei buruz hitz egin dute: «Paretak pintatu ditugu, argiteria berritu dugu eta sofa berriak jarri ditugu». LHko 4. mailatik 6. mailara bitartekoek astelehen eta ostegunetan erabiltzen dute zerbitzua eta, ostiral eta larunbatetan, DBHko 1. eta 4. maila artekoek. Mailaren arabera banatzen dituzte ordutegiak, eta gaztetxoek bertan egoteko aukera izaten dute. Artutxak nabarmendu duenez, «ordenagailua, telebista, jokoak eta jolasak izaten dituzte» han: «Eta orain, plazan estalpea dagoenez, bertara ere ateratzen dira jolasera».

Ahalegin berezia egin du aurten, udalak, Aste Santuetarako programazioa prestatzeko. Gaztematika Gipuzkoako Haur eta Gazteen Sustapenerako Sistemarekin eta Gipuzkoako Haur Txokoekin elkarlanean antolatu dituzte jarduerak, 10 eta 17 urte arteko gazteentzat.

Gaztezuloko hezitzaileak eman du antolatutako jardueren berri eta, argitu duenez, drona maneiatzeko hiru orduko ikastaroa egingo dute, hasteko, apirilaren 16an: «Alde teorikoa izango du saioak, eta gero praktikan jartzeko aukera izango dute, 10 urtetik gorako gazteek», esan du. Hurrengo egunean, hilaren 17an, Muga Ranch-era bisita egingo dute, eta zaldian ibiltzen ikasiko dute. Ekitaldi guztiak ez dituzte, ordea, Zizurkilen egingo. Pazko astean bi eguneko egonaldia egingo dute Sastarraingo baserri eskolan eta, apirilaren 26an, Iruñera joango dira, bertako Salting-ean parte hartzera.

Ekintza horietan izena emateko epea irekita dago, eta apirilaren 11ra bitarteko aukera dute Zizurkilgo gaztetxoek. Horretarako Gaztezulora bertara jo beharko dute edo, bestela, Zizurkilgo udal bulegoetara.

EGITARAUA