Frakzioka, bildutako hondakinen %47a organikoa izan zen eta %27a errefusa. Ontzi arinak %11 izan ziren, %10 papera eta kartoia eta %1,5 beira. Poltsa gehienetan gai guztiak "nahasian" agertu zirela aipatu dute udaleko iturriek, eta beste gutxi batzuetan, "gai birziklagarriak edukiontzi bidez kudeatzen direla pentsa daiteke, eta errefusa eta organikoa kalera botatzen diren poltsa horien barruan daudela".
Bi orduz aritu ziren karakterizazio egin zuten langileak poltsak ireki eta barruan zegoena ikusten, aztertzen eta sailkatzen. Gai edo frakzio bakoitzari dagokion hondakinak pisatu eta dagokion edukiontzira bota zituzten. 115 kilo hondakin pisatu zituzten.
Zizurkilgo udala kezkatuta dago kalean topatzen diren zabor poltsekin. "Hainbeste hondakin kalean botatzea ez da normala, eta hondakinen bilketarako dauden bideak erabiltzeko eskatu nahi diegu hondakinen bilketa sisteman parte hartzen ez duten herritarrei. Denon artean irudi hau berriz ez ematea lortu dezakegulako".