Zizurkilgo merkatari eta ostalariek saskia osatu dute, beren produktuekin, Euskaraldiaren harira azaroaren 12tik 18ra bitartean erosketak euskaraz egin dituztenen artean zozketatzeko. Tarte horretan, zenbakiak banatzen ibili dira erosketak euskaraz egin dituztenei, bai eta, erabat euskaraz egiteko gai ez izan arren, agurrak behintzat euskaraz egiteko saiakera egin duten bezeroei.
Saskia oso oparoa da, hainbat motatako produktuz eta zerbitzuz osatua; izan ere, Zizurkilgo merkatari guztiek eta ia ostalari gehienek egin dute ekarpena saskia osatzeko garaian. Hain zuzen, Zizurkilgo Udalak eskerrak ematen dizkie herriko merkatari eta ostalari guztiei, Euskaraldia kanpaina herritarren artean zabaltzen eta kanpaina aurrera eramaten emandako laguntzagatik.