Arratsaldeko ekitaldietan haur eta gazteek izan dute bere tartea, eta baita ere herri kirolek. Herriko gaztetxoak boladan dagoen zibarekin aritu dira jolasean frontoian, eta ping-pongean aritzeko aukera ere izan dute.
Udaletxearen aurreko probalekuan idi demak izan dira, herrian ohitura denez. Bi mila kiloko harriarekin aritu dira, eta Aitor Aizpurua asteasuarraren idi pareak irabazi du, 54 plaza, 3 zinta eta 1,6 metro eginez. Iñaki Oliden oriotarraren idi pareak 50 plaza eta metro bat egin ditu. Gertu ibili dira Aitor Matxain errenteriarraren idiak, 50 plaza egin baitituzte, baina hirugarren postuarekin konformatu behar izan dute. Euri pixka bat egin badu ere, jende dezente izan da idi probak ikusten.