Asteazkenean amaituko da Zimiterioko pilota txapelketan izena emateko epea

Tolosaldeko Ataria 2018ko eka. 8a, 11:38

Ziotza Kirol Elkarteak antolatuta, Zimiterioko binakako Malli Memoriala pilota txapelketaren 16. edizioa jokatuko da aurten. Izena emateko azken eguna ekainaren 13a izango da.

Hastear da Zimiterioko pilota txapelketa. Arrakasta izaten du elizaren ondoko frontoiari bizia emateko sortu zen txapelketa herrikoiak. 2015az geroztik hartu zuen Zimiterioko pilota txapelketak Malli Memorialaren izena, Angel Usabiaga zena gogoratzeko.

Edonork eman dezake izena txapelketan, eta bikote bakoitzak 10 euro ordaindu beharko ditu izena ematean. Bikote irabazleak, kopaz gain, 100 euroko saria eta afaria eskuratuko ditu. Txapeldunordeak, berriz, garaikurra, 50 euro eta afari bat. Hirugarren eta laugarren sailkatzen diren bikoteek ere afari bana eskuratuko dute. Lehen bikote zizurkildarrarentzat 30 euroko saria izango da.

Finalak eta hirugarren eta laugarren postuko partidak jaietan jokatuko dira, abuztuaren 16an.

Izena emateko, datorren asteazkena baino lehen bi telefono zenbaki hauetakoren batera deitu beharko da: 671 699 400 edo 695 752 962.

 

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!