Juan Kruz Igerabide (Gipuzkoa), Ttittika Rekalt (Zuberoa), Julio Soto (Nafarroa), Ana Urkiza (Bizkaia), Daniel Landart (Lapurdi), Txema Abarrategi (Araba) eta Onintza Enbeitak (Bizkaia) hartu dute parte ekitaldian. Bakoitzak bere euskalkian hitz egin du, eta Landartek Behe Nafarreran ere irakurri du testua. Testu batzuk liburuetatik atera dituzte, eta besteak egun honetarako espresuki idatziak izan dira. Irakurketa jarraituan hitz eta ahoskera ezberdinak entzuteko aukera izan da, beraz.
Euriak ere Euskalkien Egunean egon nahi zuen, eta horregatik egin da irakurketa saioa liburutegian. Plazan, hainbat postu izan dira, bakoitza herrialde batekoa, eta herriko hainbat elkartek eta taldek prestatu dute postua zein bertan zerbitzatu diren jakiak. Euskararen zein Euskal Herriaren aberastasunak hartu du gaurkoan Zizurkil.