Aiztondo bailaran ahalik eta sinadura gehien lortu nahi dituzte Gipuzkoako Foru Aldundira helarazteko.
Aldundiak 2010ean hartu zuen Zizurkilgo saihesbidea egiteko konpromisoa, baina oraindik ez da bete. Sinadura bilketa abiatu duten herritarrek esan dutenez, "hasieran atzerapenaren arrazoi gisa krisia aipatu bazuten ere, aitzakia hori desagertu dela eta dirua badutela aldarrikatzen dute Aldundiko agintariak eurek. Iruditzen zaigu ezin dugula zain jarraitu".
Azken hamarkadetan Elbarrena auzoak egunero-egunero sekulako trafikoa jasaten du herriaren erdi-erditik –horietako asko kamioiak– eta egoera honek herritarren bizi kalitatea "nabarmen kaltetzen" duela uste dute bilketa abiatu duten herritarrek.
Nahi duenak sinatzeko aukera izango du Zizurkilen Egarri tabernan, Iriarte ostatuan eta Saski kafetegian; Villabonan RK tabernan; Asteasun Iturriondo jatetxean; Adunan Uztartza aterpetxean; Alkizan Ostatu tabernan; eta Larraulen herri ostatuan.