Aiztondoko liburutegiaren bigarren urteurrena ospatzeko ekitaldien barruan egon zen Juan Kruz Igerabide Zizurkilen. Bertara hurbildu ziren haurrek liburua ilustratu duen Elena Lauraren erakusketa ikusi, Igerabideren azalpenak entzun, eta abezedarioko letrekin jolasteko aukera izan zuten.
Elena Laura Serrano Granadan jaiotakoa da eta bertan, Vegas del Genil herrian bizi da, nahiz eta gazte garaia Irunen eman zuen. Hantxe hasi zen marrazten Mensu pintorearekin. Pinturak eta grabatuak egiten ditu, baita serigrafiak ere, linoleoak eta tipografia artistikoa. Feria eta biltzar ugariren kartelak egin ditu eta leku askotan jarri ditu erakusketak: Alemanian, Frantzian, Danimarkan, New Yorken, Miamin eta Tokion, besteak beste.
Granadako Alhambran Alhambramientos erakusketa egina du eta Granadako poetekin hainbat liburu osatu ditu, berak ilustratuta. Abezedario hau da Juan Kruz Igerabiderekin egin duen lehen lana.