Ekitaldi politiko hunkigarria egin dute Zizurkilgo Aiztondora Egunean; lehenik eta behin, Aiztondoko Udaletako zinegotzi eta alkateak igo dira oholtza gainera eta euskal presoek jasaten dituzten eskubide urraketak salatu dituzte: "Astebururo, milaka kilometro egitera behartzen dituzte euskal presoen senideak. Arriskuaz gain, sekulako ahalegin ekonomikoa eskatzen diete eta preso horiek seme-alabak dituzten kasuetan bikoiztu egiten da ankerkeria", azaldu dute.
Ondoren, Aiztondoko euskal preso politikoen senideak igo dira oholtza gainera, eta astebururo beren senideak ikusteko egin behar duten bidaiaren kronika egin dute. Ondoren, dantzariek Agurra dantzatu diete, eta oroigarriak ere banatu dizkiete.
Azkenik, Zuricheko bidaian ateratako argazkien bideo proiekzioa eskaini dute; irailaren amaieran manifestazioa egin zuten Zurichen Nekane Txapartegiren askatasunaren alde, eta bertako irudiekin osatu dute bideoa. Nekane Txapartegik berak ere hainbat bideo bidali dizkiete gerturatutakoei, eta eskerrak eman dizkiete urte hauetan eskainitako babesagatik.
Ekitaldiaren ondoren, jan-edana eskaini dute gerturatutakoentzat, eta Unai Mendizabal, Beñat Iguaran eta Haritz Mujikak zuzeneko musika ere jo dute.