Duela 23 urte hasi zuten Txapel eguna ospatzeko ohitura Zizurkilen. Berriro ospatzeko asmoa ez bazuten ere, egunak izan zuen arrakasta ikusita, ordutik urtero ospatu duten festa izan da. Txapel egunean txapeldun bat izaten da urtero, "pertsona herrikoia izatea, ezaguna eta jendearekikoa" izatea da antolatzaileek kontutan hartzen dutena, eta ondoren txapeldunaren ardura izaten da udan Zizurkil goiko festetan suziria botatzea festei hasiera emateko. Larunbatean Benardo Arregik jaso zuen txapela, 2016ko Txapel Eguneko txapela. Horrela erabaki zuen festa batzordeak eta azpimarratu Aundiko Benardo herrian hamaika lanetan dabilen pertsona dela.
Larunbatean, Txapeldunen musa izan zuten Zentroan. 10 bat bikote aritu ziren eta batzuetan kasualitateak horrela izaten dira, Benardo Arregi bera izan zen txapeldun, Pello Garinekin bikotea osatuta. Horrez gain, Bukalai dantza taldeak emanaldia eskaini zuen Intxaur pilotalekuan. Ondoren, triki-poteoa eta afaria izan zituzten. Afalondoren jarri zion txapela Arantxa Usabiagak, iaz omendu zuten Anjel Usabiaga Malli zenaren arrebak.