Unai Mendizabal zizurkildarrak irabazi du VIII. Erniarraitz sariketa. Atzo gauean jokatu zuten txapelketako azken saioa, guztiz beteta zegoen Azpeitiko gaztetxean.
'Mendi'-k 279 puntu lortu zituen orokorrean, eta German Zelaia, Erniarraitz bertsozale elkarteko sortzaileetako baten eskutik, jaso zuen irabazlearen txapela. Iguaranek bigarren egin zuen 278,5 puntu batuta. Jon Gurrutxaga azpeitiarrak lortu zuen hirugarren postua. Hemen sailkapena eta puntuazioa:
- Unai Mendizabal: 279 puntu.
- Oihana Iguaran: 278,5 puntu.
- Jon Gurrutxaga: 269,5 puntu.
- Amaia Iturriotz: 267,5 puntu.
- Gemma Urteaga: 265,5 puntu.
- Aitor Salegi: 261,5 puntu.
Txapela gutxi ez, eta bertsorik onenaren saria ere irabazi zuen Unai Mendizabalek, zortziko txikian abestutako bertso batekin.
Lau saiotatik azkena
Guztira 18 bertsolarik hartu dute parte txapelketan, eta hiru kanporaketa jokatu dituzte finalaren aurretik. Oihana Iguaranek bigarren saioa irabazi zuen.
Erniarraitz bertso sariketa bi urtean behin antolatzen dute, bertso parrandarekin txandaka. Beraz, datorren urtean bertso parrandaren txanda izango da, eta 2018an jokatuko dute Erniarraitz lehiako IX. edizioa
Atzoko argazki gehiago Urola Kostako Hitzan