Gipuzkoakoa, Euskadikoa eta igandean, Espainiakoa. Txapelketa guztiak irabazi ditu Jokin Alberdi zizurkildarrak. Azken hau, 2014an kadeteetan irabazi zuen. 2015ean juniorrekin aritzea tokatu zitzaion, eta jubenilen mailan lehen urtea izanagatik, berriro irabazi zuen Espainiako Txapelketa. Igandean Torrelavegan berriro juniorrekin atera zen Alberdi, eta hirugarren urtez jarraian, podiumaren gorenera igo zen.
Irteera hartu orduko aurreratu zen Jokin Alberdi Torrelavegako lasterketan. «Iazko zirkuituaren oso antzekoa zen, eta ahalik eta akats gutxien egitea zen gakoa. Hasieratik lekua ondo hartu dut, eta gero, ondo joan naiz», zion zizurkildarrak lasterketa amaitu ostean.
Aurten prestakuntza desberdina egin du Alberdik, eta horri esker, abendura eta urtarrilera sasoi betean iritsi da. Orain, Munduko Kopako bi lasterketa ditu aurretik. Ondoren etorriko da Munduko Txapelketa.