Joan den ikasturtean mugikortasuna landu zuen herriko ikastetxeek Agenda 21 programaren baitan. Ikasturtearen amaieran udalari zenbait proposamen egin zizkioten eta horiek aztertuta, erantzunak besapean zituztela joan dira ikastetxeetara Joxe Mari Luengo alkatea eta Maite Amenabar hezkuntza zinegotzia. "Garrantzitsua da haurrek ere ikus dezaten aztertzen ditugula euren proposamenak", nabarmendu dute Zizurkilgo udaletik.
4 proposamen
Bidegorri sareari lotuta, Zizurkilek sare osatua duela azaldu zieten udal ordezkariek baina eskaera aintzat hartuta konpromisoa hartu zuten, gaur egun, Adunarekin lotzen duen oinezko bidea legealdi honetan bertan erabat asfaltatzeko. Kotxe hibidroaren kasuan, oraindik kotxe elektriko hauek oso garestiak direla azaldu zen baina udalak jakinarazi zien ikasleei diru laguntza eskatua diola Eusko Jaurlaritzari kotxe hibidro bat erosteko. Bizikleta aparkalekuen kasuan, Zizurkilgo Udalak konpromisoa hartu du Zubimusu ikastola parean puskatutakoak kendu eta berriak jartzeko eta Danena Futbol zelaiaren sarreran ere aparkalekua jarriko du. Azkenik, itsuentzako semaforoari dagokionez, Zizurkilek duen semaforo bakarra Aldundiaren eskumenekoa dela azaldu zieten udal ordezkariek ikasleei eta eskaera Aldundiari bideratuko zaiola esan zieten.
Ikasturte honetan kontsumoa izango dute aztergai haurrek Agenda 21 programan.