«Matxirulorik gabe askoz hobe»

Aurtengo udan beste hainbat herritan egin den bezala, eraso sexisten aurkako manifestazioa egingo da Zizurkilgo festen barruan. Estetika jakina eramango dute Aizaneko kideek adierazi dutenez: «Aurpegia tapatuta eramango dugu eta musika eta leloak tartekatuko ditugu. Erasotzaileen aurrean jarrera bat agertu nahi dugu: ez gaituzte gehiago kikilduko, orain guk beldurtuko ditugu».

Uda partean eta festa gunean erasoak ugariagoak direla salatu dute zizurkilgo feministek: «Alkoholaren aitzakia jartzen dute nahi dutena egiteko; badirudi ez dagoela araurik, dena dela zilegi eta gu, emakumeok, harrapatu beharreko ehiza trofeoa garela».

Erasoak salatzeko baliatuko dute biharko mobilizazioa baina baita elkartasun feminista lantzeko: «Elkarrekin bat eginda, aurre egin diezaiekegu erasotzaileei». Indar erakustaldi bat izango da manifestazioa, «borrokatzeko prest gaudela erakutsi nahi dugu».