Maiatza hasieran abiarazi zutenez geroztik, Gipuzkoako Bertsolari Txapelketako sailkapen fasea aurrera doa, irailetik gero eta gertuago. Asteburuan eskualdeko bost bertsolari ariko dira kantuan, dagokien saioan, eta puntuazioak batu zain geratu beharko dute, Gipuzkoa Bertsotan fasetik txapelketarako jauzia emateko dituzten aukerak ezagutzeko.
Mikel Artola alegiarrak jada bi saio eginak ditu eta, beraz, zenbait bertsolariren aldean puntu gehiago eskuratzeko aukera izan du. Hala ere, batez besteko puntuazioak aterata, 74 bertsolariren artetik hirugarren puntuazio onena du. Ondo bidean, beraz, datorren irailaren 20an hasiko den Gipuzkoako Bertsolari Txapelketan parte hartzeko moduan izango da Artola.
Zizurkilen saioa
Imanol Irazustabarrena eta Oihana Iguaran kantatzen lehenak izango dira, asteburuan, Tolosaldeko bertsolarien artetik. Horrela, biek ala biek arratsaldeko saioei dagozkien lanak egin beharko dituzte, Oñatin eta Zumaian, hurrenez hurren.
Orain arte egindako lanari begira jarriz, Irazustabarrena alegiarra 52. postuan da Gipuzkoa Bertsona faseko behin-behineko sailkapenean eta, Oihana Iguaran amasarra, berriz, 11. postuan dago. Ikusi egin beharko da arratsaldeko lanek zein gora-behera sortzen dizkien puntuazioan.
Igande goiza izango du, Adur Gorostidik, bigarren saiorako eguna, eta Usurbilen ariko da; 34. postuan dago, gaur egun.
Bere aldetik, Haritz Mujikak ere Usurbil izango du plaza, eta ahaleginak egingo ditu 50. postu
horretatik goruntz egiteko.
Asteburua biribiltzeko, Gipuzkoa Bertsotan eskualdera bertaratuko da, izan ere, Zizurkilen jokatuko dute igande arratsaldeko bi saioetako bat. Beñat Iguaran ariko da bertan, eta orain arte egindako lan txukuna hobetu beharko du arratsaldeko ariketetan; bosgarren sailkatua da oraingoz.
Sarrera guztiak aretoetan bertan eskura daitezke, 10:00etan eta 12:00etan, 6 euroan.