Hiribildu titulua lortu zuela 400 urte bete ziren urtarrilean eta horregatik data hori gogoratuz antolatu dute aurtengo Maiatza Saltsan ekimena Zizurkilen. Herritarrak protagonista hartuta antolatu dira ekitaldi gehienak. Lehenengoa, aurreko apirilaren 28an egin zuten, Hernandorena elkartekoek Zizurkil 1615. Hiribildu baten eraketa liburuxkaren aurkepena egin zuten Atxulondo kultur etxen. Lan horretan jasotakoak paneletan bildu eta hilabete osoan izango dira ikusgai Zizurkil goiko eta beheko kultur etxeetan.
Hilabetearekin jarraitzeko, bihar ostirala, Iriarte tabernan bertso afaria izango da Jexux Mari Irazu eta Iker Zubeldiarekin.
Herri antzerkiarekin batera, aurtengo Maiatza Saltsan ekimenaren osagai nagusia larunbatean egingo duten 400 pauso Zizurkil ezagutuz izango da. Lau ibilbide prestatu dituzte eta goiko nahiz beheko plazetatik aterako dira ibiltariak. Eneko Agirre musherrak 11:30etan Joxe Arregi plazatik egingo du irteera berezia. 13:00etan Pedro Mari Otaño plazan jarri dute helmuga parte hartzaileentzat. Bazkaria norberak eraman beharko du eta udalak mahaiak eta sagardoa jarriko ditu frontoian. Bazkalostean Gugaz taldearekin erromeria izango da.