Hasi orduko hartu zuen aurrea Xabier Arriak. Tolosako zezen plazan jendea ero moduan ibili zen bi aizkolariak animatzen, igandean. Errezildarrak lehen enborrean 15 segundo inguruko aldea atera zion Joseba Otaegiri. Apustua amaitzeko oraindik 19 kanaerdiko geratzen ziren.
Lehen sei enborretan aldeari eustea lortu zuen Otaegik. Zazpigarrenean, oraindik urrutira joan zen, errezildarrari aurrea hartu baitzion zizurkildarrak: «Parte horretan, nirea baino egur txarragoa tokatu zaio, eta aurrea hartzea lortu dut. Ilusio pixka bat egin dit, baina hurrengoan berriro aurreratu da. Bere erritmoan jarraitu du, eta nirea pixka bat haustea lortu du».
Hortik aurrera, Arria V.a aurretik joan zen, amaiera arte. Otaegi saiatu zen, eta badaezpada gertutik segitu zuen errezildarra, baina ez zuen hutsik egin hark, eta amaieran, 12.000 euroko sariarekin joan zen.
Xabier Arriak lehen hamar enborrak 18 minutu eta 15 segundoan bota zituen. Otaegik lan bera egiteko, 19:13 behar izan zuen. Bi denbora ikusgarri! Batak zein besteak izugarrizko erakustaldia eskaini zuten. Lanak amaitzerakoan erritmoa jaitsi egin zen. Irabazleak saria eskuetan zuelako, galtzaileak, aurkaria urrunegi zelako. Hala eta guztiz ere, denbora txukunak egin zituzten: 39:49 eta 45:09.
Miel Mindegiaren 31 minutuan urrun daude, baina hori ez da erreferentzia bat. Alde batetik, egurrek duten eraginagatik, eta bestetik, nafarra izan den aizkolaririk handiena edo handienetakoa delako. Hori bai, igandeko bi aizkolariek euren aurkariei errespetua sartu zien, egun, denbora horiek ez baitaude edonoren eskura.
Saioa amaitu ondoren, Joseba Otaegik argi hitz egin zuen: «Ez da posible izan. Berak gehiago egin du, eta puntu. Nik etxeko lana egin dut, baina berea ikusgarria izan da. Egur hauek 40 minuturen azpitik botatzea ez da nolanahikoa. Zoriondu besterik ez dago egiterik».
Enborren inguruan, zizurkildarrak bere iritzia eman zuen: «Nik ekarritakoak onak ziren. Bereetako bat ere bai, nahiz eta barrua zikina zuten. Lau, ordea, nahiko indartsuak ziren». Horrek azken denborei balioa handitzen die.
Aurrera begira «lanean eta hobetzen» jarraitzea besterik ez dagoela zioen Otaegik: «Prestakuntza inoiz baina errazago eraman dut. Gustura ibili naiz. Orain, txapelketa eta erakustaldiak tokatzen dira».
Apustuaren amaieran, Tolosako zezen plazan aizkolari ugari ikusi ziren, egurrak aztertuz eta aizkolariekin hizketan. Apustu soinurik ere entzun zen. Larretxea eta Arria V.aren artean zer edo zer ba ote dagoen, edo. Otaegik, aurrera begira, ez du aterik ixten: «Ezin da pentsatu denak irabaziko ditugunik, eta modu berean, ez dut pentsatu nahi denak galduko ditudanik. Segi egin behar da».