Zizurkilgo Ugare auzoan dagoen aparkalekuan autoa utzi ahal izateko egoiliarren txartela atera beharko da. Era berean, denbora mugatuko zenbait aparkaleku ere izango ditu Ugarek. Sistema berria abenduaren 15eko osoko bilkuran onartu zuen udalbatzak, EH Bilduren aldeko botoekin eta EAJren abstentzioarekin.
Aurreikuspenen arabera, urte hasierarekin batera eskatu ahal izango dute bizilagunek egoiliar txartela eta urteko 40 euro ordaindu beharko dira. Bi baldintza bete behar dira, hala ere: Zizurkilen erroldatuta egotea eta zirkulazio zerga herrian ordaintzea. Urtarrilean zehar egingo dituzte pintaketa eta egokitze lanak eta segituan jarriko dute sistema berria martxan.
Joxe Mari Luengo alkateak azaldu duenez, «Ugareko auzotarren bizi kalitatea hobetzeko pausoa da, urte askotako eskaera bat bete da». Auzotarrekin batera egindako prozesua eta gero onartu dute ordenantza.