Zizurkilgo Hernandorena kultur elkarteak bere esku zituen Pedro Mari Otaño bertsolariaren Argentinako eskuizkribuak Donostiako Koldo Mitxelena kulturunean uztea erabaki du. Gaur goizean sinatu dute hitzarmena eta horrela denen eskura egongo dira aurrerantzean Susana Ardanaz Otaño oinordekoak emandako bertsolariaren lanak. Zizurkilgo elkarteak, jasotako lanen balioaz jabetuta, hauek zabaltzeko eskaini zizkion Gipuzkoako Foru Aldundiari dohaintzan.
Aurrerantzean hortaz, 1894. urteko Pedro Mari Otañoren oroimenak eta 1904. urtean Buenos Aireseko Laurak Bat elkartean aurkeztutako Cátedra de Bascuence eskuizkribuak, eta Alkar eta Poesías Vascas liburuak egongo dira Koldo Mitxelenan.
Bertsorako berezko dotoretasuna zuen Pedro Mari Otañok eta bertso apartak utzi zituen. Ezagunen artean daude Limosnatxo bat edo Mutil koxkor bat, eta herrimina izan zen bere gai nagusia Amerikako Pampetan poeman adierazten duen bezala.
Dohaintzaren ordainetan Gipuzkoako Foru Aldundiak Pello Esnal ikertzailea eta Auspoa taldeko partaideak prestatutako eskuizkribuen argitalpen digitala egin du, 50 ale, bereziki Hernandorena elkarteari, Zizurkilgo Udalari, oinordekoei eta Argentinako kultura erakundeei banatu asmoz.