Udalak ez du igoerarik egingo tasetan "egoera ekonomikoak horrela eskatzen duelako". Salbuespen bakarra, hondakinen tasarena izango da.
Ahalik eta gehien birtziklatzeko helburuarekin jarri zuen martxan atez-ateko bilketa sistema udalak, eta birtziklatzen dutenen ahalegina aitortuko dute tasen bidez. Horretarako Tolosaldeko hondakinen mankomunitatearen ordenantza baliatuko dute.
Bestalde, hondakinak bide publikoan bereizi gabe uzten jarraitzen duten herritarrei udal tasa berria aplikatuko zaie, oso-osorik. Aurreko urtekoarekin alderatuta, %30 inguruko igoera du tasak. Kopuru hori zabor nahasia bildu eta zabortegira eramateak udaleko diru-kutxan eragiten duen gain kostuarekiko proportzionala da.
Udalak prentsa ohar bidez azaldu duenez, tasa sistema hau "bidezkoagoa da, herritarren gehiengoak ez baitu zertan jasan batzuek bide publikoan hondakinak bereizi gabe uzteagatik eragiten duten gain kostua".
Dena den, tasa horiek ez dira finkoak, herritar bat birziklatzen hasten denean tasaren murrizketa aplikatuko baitzaio. Hori dela eta, tarifa murrizketa jasoko dutenen zerrenda eguneratua edukitzeaz eta irakurketen erregulartasuna frogatzeaz hilabetero arduratuko da udala. Tarifa murrizketaren onuradun izateko, mankomunitateko ordenantzak ezarritakoaren arabera kudeatu beharko dira hondakinak.