Zizurkilgo alkate izana da Lazkano eta gaur egun EAJren bozeramailea da udalean. Olatz Peon, EAJko bailarako burukideak aurkeztu du Marian Lazkano gaurko agerraldian eta erronka honen aurrean erakutsi duen prestutasuna eta jarrera ona azpimarratu nahi izan ditu Peonek. Une honetan ezker abertzalearen esku dagoen gobernuaren benetako alternatiba izan nahi du Lazkano buru izango duen taldeak.
2015eko hauteskundeetako alkategaiak, bere aldetik, Zizurkilgo EAJko taldeak eman dion babesa eta konfiantza eskertu ditu. "Pertsonak, hauen duintasuna eta ongizatea" markatu ditu alkate ohiak Zizurkilgo proiektuaren ardatz nagusitzat. Zizurkilek aldaketa bat behar duela dio Lazkanok, zizurkildarren benetako arazoei erantzuna emateko, "ez berriak sortu, hemen atez atekoarekin gertatu den bezala". Zizurkilek dituen behar eta erronkak aztertzeko, herriko eragile eta sektoreekin biltzen ari dira dagoeneko EAJkoak beraien ekarpenak jasotzeko.