Harituz Tolosaldeko Bertsozaleen Elkarguneak egin ditu aurten, epai mahai lanak, eta aurten iaz baino lan gutxiago jaso badituzte ere, oso interesgarriak izan direla esan dute. Lanen aniztasuna ere nabarmendu dute.
Helduen mailan lehen saria Amaia Agirreren Donostia, Europako kultur hiriburu lanari eman diote, eta bigarrena Aitor Albisturren Zuri, ama izenekoari. "Lantzen duen gaurkotasuneko lanari mamia horren ondo ateratzeagatik eta bertso sortaren kalitate teknikoagatik" eman dute lehen saria. Bigarrena aldiz, "amarekiko maitasun eta miresmena ardatz harturik autoreak bere barne mundua azaltzeko duen egokitasunagatik eta bertsoak goitik behera osatzeko duen dotoreziagatik".
Gazteen mailan ere bi sari banatu dituzte. Lehena Maialen Akizuren (Lan) bideak izan da "etorkizuneko ikasketak eta bizibidea aukeratu behar dituen ikasle baten gogoeta eta kritika soziala azaltzeko duen modu dotore eta ulerterrazagtik, eta horretarako darabilen teknika apartagatik". Bigarren sariduna, Krisia, "hainbestetan entzuna den krisi ekonomikoa aparte utzita autoreak bere kezkak edo barne krisiak modu egokian azaldu izanagatik" aukeratu dute, Aitor Servierren lana, hain zuzen.
Aurten diasporako euskaldunei dei berezia egin zieten lehiaketan parte hartzeko, eta beraiei zuzendutako sariak ere banatu dituzte. Lehen saria Todor Azurzaren Euskara, gure eguneroko borroka izeneko lanari eman diote, eta bigarren saririk ez ematea erabaki dute.
Hemen dituzue irakurgai saritutako lanak.