Hasieratik herriko gazteen arteko harremana bultzatzea izan du festa egun honek. Izan ere, Mendizabalen hitzetan «Zizurkil Goian festetan eta, giroa sortzen joan zen eta lagun talde bat» osatu zuten. Pixkanaka Zizurkil Behekoekin ere harremana sortzen joan zen eta udalaren bultzadatxoa ere jaso zuten. Honela, festaren aitzakiarekin «harremanak estutzen» joan dira, eta Mendizabalen ustez gazteen artean aurreko urteetan baino «giro hobea edo gutxienez estuagoa» dago egun.
Orain helburu bezala dute, oraindik asanbladara edo gazte eguneko taldera gerturatu ez diren gazte horiek «erakartzea». Hala ere, ziur dago, agian, antolakuntzara gerturatu ez diren gazteak larunbatean festa egunera gerturatuko direla eta «beraiek ere ondo pasako dutela». Hortaz, oraindik festan parte hartu ez duten gazteak badaude, parte hartzera «animatu» nahi dituzte. Eta larunbatean festan parte hartu nahi duen orok aukera zabalik du oraindik. Bazkarirako txartelak, esate baterako, 15 euroan daude salgai Iriarte, Zentroa eta Egarri tabernetan eta asanbladako kamixetak Zentroan daude salgai 12 eurotan.
Egitarau originala antolatu dute larunbaterako, «kanpoko jendea erakartzeko zerbait berria egitea pentsatu genuen». Jada dena prest dute, eta «saltsa pixka bat» sortzeko gogoz daude. Beraz, gonbidapena zabalik dago bertaratu nahi duten guztientzat, eta nahi duenak goizaldera arte festa giroan ibiltzeko aukera ere izango du.
III. Gazte Eguna; martxoak 15, larunbata
· Baso mutilen lehia.
· Gurpilarekin elizari buelta.
· Traktorea ea plazara nork eraman azkarren.
Ondoren. Txepetxaren jaitsiera.
14:30. Gazte bazkaria.
18:00. Txerri harrapaketa, Lartingo zelaian.
Ondoren. Triki poteoa.
21:00. Xolomo afaria, zimiterioan.
22:30. Kontzertuak: Berri Tzarrak eta Zesuma.