Larunbatean Euskal Herriko Mendi Duatloi Zirkuituko zazpigarren proba puntuagarria jokatu zen Idiazabalen, eta, aldi berean, Euskal Herriko Txapelketa izan zen. Eskualdeko zenbait duatloilarik parte hartu zuten, eta bikotekako modalitatean, Unai Altuna eta Haritz Artano alegiarrek osatutako Xaxiziklistak bikotea izan zen onena.
Emakumezkoetan, Maitane Garmendia ibartarra hirugarren izan zen. Aiara Garaialdek lortu zuen garaipena, eta Ainhoa Markinez izan zen bigarren. Izarne Maioz asteasuarra laugarren izan zen, eta Jone Gomez tolosarra seigarren.
Gizonezkoetan, Adrian Losarcos nagusitu zen, Josu Urrestarazu izan zen bigarren, eta Gexan Albisu hirugarren. Eneko Gurrutxaga amasarra bosgarren postuan sailkatu zen, Beñat Doyharzabal ibartarra hamaikagarren izan zen eta Aitor San Sebastian zizurkildarrak ezin izan zuen proba amaitu.