Amaitu dira udako festetako nahiz bestelako torneoak pilotarientzat. Udazkenean bete-betean sartuta, etzi hasiko da 2026ko Lau eta Erdiko Txapelketa, eta eskualdeko lau pilotarik parte hartuko dute A Seriekoan. Iaz, finalerdietara sailkatu zen Jokin Altuna amezketarra. Ondorioz, aurten, final-laurdenetan sartuko da txapelketan. Iñaki Artola alegiarrak, Erik Jaka lizartzarrak eta Jon Ander Peña tolosarrak final-zortzirenetako kanporaketa gainditu beharko dute final-laurdenetako ligaxkara sailkatzeko. Laurek egon nahi dute azaroaren 22an Bilboko Bizkaia pilotalekuan jokatuko den finalean. Finalera sailkatu eta irabaziz gero, Lau eta Erdiko Txapelketako bosgarren txapela jantziko luke Altuna III.ak; gainerako hirurentzat kaiolako lehena litzateke.
Eskualdeko pilotariak B multzoan egokitu dira. Artolak eta Peña II.ak elkarren aurka jokatuko dute final-zortzirenetako kanporaketa, urriaren 12an, Tolosako Beotibar pilotalekuan. 17:15ean hasiko den jaialdiko bigarren neurketa izango da. Jakak, berriz, 2024an txapeldun izan zen Unai Lasoren aurka jokatuko du final-zortzirenetako kanporaketa, larunbatean, Iruñeko Labrit pilotalekuan. Bi jaialdietarako sarrerak Entradasfronton.com webgunean erosi daitezke. Bi kanporaketetako irabazleak final-laurdenetako ligaxka faseko B multzora sailkatuko dira, eta elkarren aurka jokatuko dute lehen jardunaldian, urriaren 17an, Bilbon; Altuna III.a eta Zabala jada multzo horretan daude, eta hilaren 18an jokatuko dute elkarren aurka, Gasteizen.
Bestalde, A multzoan, final-laurdenetako ligaxkan sailkatuta daude Peio Etxeberria –iazko txapelduna– eta Ezkurdia. Beste bi pilotariak erabakitzeko final-zortzirenetako bi kanporaketa izango dira asteburuan: ostiralean, Elordi eta Larrazabalen artekoa Durangon, eta igandean, Darioren eta Senarren artekoa Lekunberrin.
B Seriekoa, Villabonan
A Serieko txapelketaz gain, B Seriekoa ere jokatuko da. 12 pilotarik parte hartuko dute, baina ez da Tolosaldeko bat bera ere egongo. Hala ere, eskualdean izango da final-laurdenetako ligaxkako partida bat. Amianok eta Zubizarreta IV.ak Villabonako Bearzana frontoian jokatuko dute lehen jardunaldian. Urriaren 16an izango da, 19:30ean, eta binakako partida batek osatuko du jaialdia. Sarrerak dagoeneko erosi daitezke Entradasfronton.com webgunean.