Aritz Intxaurrondo korrikalari berastegiarrak, larunbatean Astigarragan jokatutako Basatrail mendi lasterketaren estreinako edizioko 17 kilometroko proba irabazi zuen, 1.15.37ko denbora eginda. Garaipen erraza lortu zuen Arbide taldeko berastegiarrak, ia 6 minutuko aldea atera baitzion bigarren izan zen Xabat Illarregi leitzarrari (1.21.26), eta ia 8 minutura helmugaratu zen hirugarren izan zen Mikel Rubio errenteriarra (1.23.30).
Iturria, bigarren
Bestalde, Osin Trail taldeko Irene Iturria bidaniarrak Olazagutiako (Nafarroa) Urbasa mendi lasterketaren 18. edizioan parte hartu zuen. 16,4 kilometroko proban, bigarren izan zen Iturria, 1.41.41eko denbora eginda. Izaskun Beunza olazagutiarrak lortu zuen garaipena (1.39.14), eta Maite Zabaleta etxarriaranaztarra izan zen hirugarren (1.47.49).
Irene Iturria, Olazagutiako podiumean. Argazkia: @unai_m
Zubillaga, laugarren
Azkenik, larunbatean Skyrunner World Series zirkuituko Gorbeia Suzien proba jokatu zen Zeanurin (Bizkaia). Skyrace proban, 32 kilometrokoan, emakumezkoetan, Domusa Teknik taldeko Oihana Zubillaga korrikalari anoetarra laugarren izan zen, 3.41.11ko denbora eginda. Atzetik aurrerako lasterketa egin zuen anoetarrak, kilometroak egin ahala korrikalariak aurreratzen joan baitzen, eta podiumetik oso gertu geratu zen, bost minutu baino gutxiagora, Natalie Beadle hirugarren sailkatuak 3.36.16ko denbora egin baitzuen.
