Judokek luzaroan itxarondako nazioarteko lehiaketetako bat jokatuko da datorren asteburuan: Nage No Kata diziplinako Munduko Txapelketa. Sarajevon (Bosnia eta Herzegovina) izango da, eta munduko talde onenek haien teknika, sinkronizazioa eta judoaren espiritua baliatuko dute txapelketa irabazteko.
Eskualdeko lau judoka izango dira bertan: Judo Tolosa klubeko Joseba eta Unai Regillaga amezketarrak eta Joseba Etxarri eta Unai Saralegi tolosarrak. Binakako proba da, eta bi bikote osatuko dituzte: alde batetik, Unai Regillaga eta Unai Saralegi, eta bestetik, Joseba Regillaga eta Joseba Etxarri.
Bi bikoteek aukerak dituzte dominak lortzeko, berriki urrezko eta brontzezko dominak lortu baitituzte Madrilen jokatutako Europako zirkuituko proban.