Jangeletako jakiak alferrik ez galtzeko Elika Heziz Tolosaldea proiektua jarriko dute martxan. Elikadura sare horren bitartez batuko dituzte ikastetxeak eta herritarrak, eta irailetik aurrera Alegiako, Tolosako eta Villabonako ikastetxeetako jangeletan soberan geratutako jakiak helaraziko dizkieta udalerri horietan egoera zaurgarrian dauden pertsonei.
Tolosaldea Garatzenek koordinatzen du proiektua, eta parte hartzen dute Alegiako Herri Eskolak, Tolosako Herrikide, Samaniego eta Laskorain ikastetxeek eta Villabonako Zubimusu eta Fleming ikastetxeek. Bertako jangeletako janari soberakinak Zutani eta Elkartasun Sarea elkarteek —zeinak Tolosako eta Villabonako elikagai bakuak kudeatzen dituzten— helaraziko dizkiete udalerri horietan egoera zaurgarrian dauden pertsonei, bietan ala bietan herriko udalaren babesarekin. Alegiako kasuan, berriz, udaleko gizarte zerbitzuetatik bideratuko dituzte zuzenean. Sarea dinamizatzeko eta kudeatzeko hitzarmena sinatu dute Zutani elkartearekin.
Egunean 150 plater
Arduradunek azaldu dutenaren arabera, ekimenean parte hartuko duten sei ikastetxeek, guztira, 23 tona hondakin organiko sortzen dituzte urtean. Elikadura sarearen bitartez, berriz, egunean 150 plater berreskuratzea aurreikusten dute. Garbiñe Mendizabal Garapen Jasangarriko arduradunaren hitzetan «izugarrizko arrakasta» litzateke hori lortzea: «Oso proiektu interesgarria eta garrantzitsua da: batetik, bigarren bizitza bat ematen zaielako soberakinei, eta ekimenak ingurumen ikuspegia eta ikuspegi soziala batzen dituelako».
Bestalde, Tolosaldea Garatzeneko Andu Martinez de Rituerto lehendakariak gehitu du 2020tik hasi zirela proiektua lantzen: «Aurretik aztertu eta nerutu dira eskualdeko ikastetxeetako jangeletan zenbat elikagai xahutzen den, eta aurretik ere sustatu dira ikastetxeetan elikagaien xahuketa murrizteko lan protokoloak eta praktika onak».
Hari berari tiraka adierazi du «zentzuzkoa» dela soberakin horiek behar dituzten herritarrengana bideratzea, baina «pentsa daitekeena baino zailagoa eta konplexuagoa» dela: «Zubimusu eta Herrikide ikastetxeetan egin dugu proba pilotua, eta frogatu dugu segurtasun berme guztiekin irits daitezkeela elikagaiak bigarren kontsumitzaile horiengana». Halaber, datozen hilabeteetan ere proiektuaren emaitzak baloratzen jarraituko dutela aurreratu du.
Proiektuak Eusko Jaurlaritzako diru laguntza jaso du, Elika Fundazioaren babesa, eta soberakin organikoak berrerabiltzen aditua den Oreka Circular Economy enpresak ere eman dizkie aholkuak.