Udako Argazki Lehiaketa jarri du martxan beste behin ATARIAk. Gaurtik hasi, eta irailaren 13ra bitarte, nahi adina argazki bidali ditzakete herritarrek, betiere, Tolosaldean bizi badira edo eskualdearekin lotura badute. Gainera, irudia bidaltzen duena izan beharko da argazkiaren jabea, eta beste inon argitaratu gabea izan beharko da. Argazkiak Ataria.eus webgunean dagoen aplikazioaren bidez bidali behar dira eta lehiaketarako sortutako argazki galerian egongo dira ikusgai.
Behin argazkiak jaso ondoren, irailaren 14an hasiko da bozketa eta irailaren 23ra bitarte egongo da botoa emateko aukera. Argazki irabazleak irailaren 25ean jakinaraziko ditugu, Ataria astekarian eta Ataria.eus webgunean.
Parte hartzaileek sari bikainak irabazi ahalko dituzte. Hiru partaide izango dira zorionekoak:
Epaimahaiaren saria jasotzen duenak Hika by Roberto Ruiz jatetxean bi pertsonarentzat Izarmendi menua irabazteko aukera izango du; Ataria.eus-eko erabiltzaileen saria lortzen duenak Villabonako Eizmendi Anaiak kirol dendan 70 euroko erosketa bonua irabaziko du; eta azkenik, parte hartzen duten Atarikideen artean ATARIAko material sorta bat zozkatuko da.
Parte hartzaileek kontuan hartzeko informazio gehiago ondorengo estekan aurkituko dute.
