Testuak euskara errazagoan irakurtzeko sistema gehitu du ATARIAk Ataria.eus webgunera. Erraztu izeneko funtzioa adimen artifizialean oinarritua dago, eta helburu nagusia testuak sinplifikatzea da, beti ere, informazioa galdu gabe.
Besteak beste, euskara ikasten ari direnentzat edo irakurtzeko zailtasuna dutenei begira egindako tresna da, baina, garatzaileek ohartarazi duenez, aintzat hartu behar da sinplifikazio automatizatua dela eskaintzen den testua, gizaki baten gainbegiradarik gabekoa. Erraztu botoia sakatuta, irakurritakoaren balorazioa egin dezake irakurleak, eta feedbacka eskertuko du ATARIAk. Horretarako Erraztu sakatu eta gero bete daitekeen formulario bat irekitzeko aukera egongo da, baina ataria@ataria.eus helbidera ere idatzi daiteke erremintaren inguruko edozein ohar helarazteko.
Ataria.eus webgunean albiste guztiek dituzte Entzun eta Itzuli botoiak, ahots sintesiaren bidezko irakurketa, eta euskaratik bost hizkuntzatara itzultzeko aukera ematen duen tresna. Eta orain albiste batzuek Erraztu ere izango dute.