Alegialdea eta Tolosa arteko joan-etorria egiten duten Lurraldebuseko autobusen geralekuak aldatu egin dituzte. Tolosako San Frantzisko elizaren pareko geralekua kendu egin dute eta, aurrerantzean, Tolosako zezen plaza izango da autobus horien abiapuntua eta helmuga.
Tolosako Udalak Rondilla kaleko aparkalekuen araudian aldaketak egin ditu, eta eremu hori autobusen trafikotik arintzeko ezabatu dute San Frantzisko elizaren pareko geralekua.
Geraleku zuzenak
Hori horrela, aurrerantzean lau tokitan hartu hala izango da autobusa Tolosatik Alegialdera joateko, hurrenez hurren, zezen plazan, San Frantzisko pasealekuaren 14. zenbakian —Renfe eta Herrikide ikastetxeen arteko bidegurutzearen ondoan—, Araba etorbideko 5. zenbakian —Eroki saltoki gunearen alboko zubiaren ondoan—, eta Bentaundin.
Kontrara, Alegialdetik joanda hiru geraleku izango ditu autobusak, hurrenez hurren, Bentaundi, Araba etorbideko geralekua eta zezen plaza.