Giro ederra izan da goizean Larten, T3T eta T2T lasterketetako lehen tontorrean; zenbait mendizale joan da inguruko herrietatik. Hori bai, ia denek hautatu dute itzala korrikalariak animatzeko; eguraldi sargoria izan da lehen ordutik, eta eguzkitik babestea besterik ez zen geratzen. Guztiek ere, animo oihu eta txalo artean hartu dituzte bertatik igaro diren ia 400 lasterkariak. Hauetako zenbaitek irribarre egiteko indarra izan dute, eta gutxi batzuek baita ikusleak txaloz eskertzeko ere.
Ander Amonarriz eta Anartz Artola hernaniarrak elkarrekin heldu dira gailurrera, 39 minutuan. Handik behera ere elkarrekin joan dira, eta denbora berean heldu dira Elduainera. Josu Urrutia ondarroarra igaro da hirugarren Lartetik, hernaniarrengandik minutu erdira. Emakumezkoetan, berriz, Larraitz Etxebeste oiartzuarra igaro da lehen postuan; 48.26ko denbora egin du. Maddalen Jimenez beratarra zuen atzetik; Etxebesterengandik ia minutu batera igaro da.
