Julen Gabirondo urnietarrak irabazi du Gipuzkoako Sega Sail Txapelketa, eta eskualdeko segalariak txapelik gabe utzi ditu. Hernanin jokatuta da txapelketa, eta Mikel Lizartza tolosarra eta Jokin Etxeberria Bedaion bizi den amasarra izan dira podiuma osatu dutenak.
Segalariek 1.000 metro koadroko saila moztu behar zuten ahalik eta azkarren, baina baita ere txukuntasuna kontuan hartuta. Gabirondok 33.10eko denborarekin txapela jantzi du. Lizartza izan da bigarrena, 36.39ko denbora eginda. Gertu izan du Etxeberria, horrek 37.14ko denbora egin baitu. Ondoren, laugarren postuan, Oier Urkola anoetarra sailkatu da, eta 40.02ko marka egin du horretarako.
Lehen aldiz aritu dira Amaiur Arrospide leaburuarra eta Josu Mendizabal zaldibiarra sega sail txapelketan. Arrospidek lortu du bosgarren postua 44.08ko denborarekin, eta seigarren postuan geratu da Mendizabal, 47.20ko denborarekin.
Argazkiak: Gipuzkoako Herri Kirol Federazioa