Gure herriko kaleak eta plazak umeen oihartzunez betetzen diren garaia hurbiltzen ari da. Udako udalekuetan, aisialdiaz gozatzeaz gain, haurrek munduarekiko jakin-mina pizteko aukera bikaina dutela uste dugu. Horregatik, ATARIAtik proposamen berezi bat luzatu dugu udalekuetarako: Egun batez kazetari tailerra. Tailer hori ikasleei euskarazko tokian tokiko komunikaziora gerturatzeko ikasturte osoan irekita dugun Erakutsiz Ikasi proiektuaren barruan kokatzen dugu, eta udarako ludoteka zerbitzuetan eskaintzen dugu.
Zer eskaintzen dugu?
Gure helburua kazetaritza eta komunikazioa haurrei modu praktiko eta ludikoan hurbiltzea da, euskara ardatz hartuta. Ez da ohiko saio teoriko bat izango; eskuak zikinduz eta sormena landuz ikasiko dugu. Saioan zehar, honako ekintzak egingo ditugu:
-
Mikrofonoak eta kamerak: Haur bakoitzak bere mikrofonoa eta kamera eraikiko ditu material birziklatuekin.
-
Munduaren berri eman: Albiste bitxiak asmatuko ditugu eta elkarrizketa eroen bidez euskaraz hitz egiteko beldurra galduko dugu.
Zergatik gurekin?
ATARIAn badakigu zein garrantzitsua den hizkuntza eremu informaletan eta dibertigarrietan sustatzea. Tailer honekin, haurrak komunikazioaren protagonistak bihurtuko ditugu, euren autoestimua eta talde-lana indartuz.