Tolosaldeko alkateen mugimenduak adierazi duenez, «berriki» jaso du Osakidetzak osatutako plan funtzionala, balizko Tolosako ospitale publikoari dagokiona. «Ia bi urtez zain egon ostean, lehen irakurraldian nabarmen antzematen da ez dituela, tamalez, Tolosaldeko osasun beharrak asetzen, ez duela beste eskualdeek duten osasun arretaren parekorik bermatzen», esan dute alkateek.
Mugimenduko kideek nabarmendu dute, zerbitzuei eta azpiegiturei dagokienez, eskualdeak gaur egun duen zerbitzu-zorroa «murrizten» duela Osakidetzaren proposamenak. «Ezinbestekoa da eskualdeko herritarrek merezi duten arreta integral, gertukoa eta euskalduna bermatzea. Hori horrela, Eusko Jaurlaritzak mahai gainean jarritako Plan Funtzionala aintzat hartuta, ospitale berria bere horretan eraikitzea beharrezkoa ote den edo Asuncion klinika publiko egin eta Osakidetzak kudeaketa bere gain hartzeari buruzko azterketa sakonagoa egiteko aukera mahai gainera eraman nahi dugu».
Alkateek gogoratu dute aukera hori mahai gainean jarri izan dutela azken urteotan. «Gipuzkoako gainerako eskualdeen pareko arreta eta zerbitzuak izan behar ditu gure eskualdeak. Eta, beste behin, urte hauetan guztietan egindako eskaeretan berresten gara».
Hori dela eta, alkateen mugimenduak Plan Funtzionala sakon aztertzeko bilera egingo du bihar, ostirala. «Ateratako ondorioekin, azalpen gehiago emango ditugu datozen asteetan, baita hemendik aurrera eman beharreko pausuen berri ere», esan dute.