Iñaki Artolak eta Jon Ander Peñak elkarren aurka jokatu dute Buruz Buruko Pilota Txapelketako final-laurdenetako ligaxkaren partida Durangon. Alegiarrak 22-19 irabazi dio tolosarrari, eta lehenengo puntua batu. Tolosarrak, berriz, orain arte jokatutako ligaxkako bi partidak galdu ditu. Artolak 16 tanto egin eta 6 galdu zituen, eta Peña II.ak 13 tanto egin eta 6 galdu.
B multzoko beste partidan, Zabalak 22-17 irabazi dio Larrazabali. Beraz, Zabalak bi puntu ditu, Larrazabalek eta Artolak puntu bana, eta Peña II.a punturik gabe dago. Hirugarren eta azken jardunaldian, Artolak Zabalaren aurka jokatuko du, eta Peña II.ak Larrazabalen aurka. Maiatzaren 9 eta 10ean jokatuko dira partida horiek, Labriten eta Beotibarren, baina enpresek oraindik ez dute zehaztu bakoitza non izango den.
Asteburu honetan A multzokoek azken jardunaldia jokatuko dute. Jokin Altunak eta Erik Jakak elkarren aurka jokatuko dute Legazpin igandean. Bestalde, Dariok eta Lasok Donostiako Atano III.ean jokatuko dute larunbatean. Multzo horretan Dariok bi garaipen ditu, Altuna III.ak eta Lasok bana, eta Jakak ez du garaipenik lortu.