Buruz buruko Pilota Txapelketaren final-laurdenetako ligaxkaren lehen jardunaldia jokatu da asteburuan, eta aritu diren eskualdeko hiru pilotarietatik bakarrak lortu du garaipena. Altuna III.ak bere lehen puntua lortu du Lasori 22-16 irabazi ondoren. Partida oso ona jokatu zuen amezketarrak, eta Laso ez zen batere eroso aritu.
Iñaki Artolak ezin izan zuen Larrazabal gainditu lehen partidan, eta 17-22 galdu zuen. Bestalde, Jakak Darioren aurka galdu zuen 10-22. Lizartzarrak ezin izan zuen bere jokoa egin, Zumaiako pilotalekura ez baitzen guztiz moldatu partidan zehar.
Asteburuan bigarren jardunaldia jokatuko da, eta Altuna III.ak Darioren kontra jokatuko du ostiralean Gernikan. Orain arteko buruz buruko partida guztietan amezketarrak lortu du garaipena, eta ikustear dago zer gertatuko den oraingoan, Dariori oso indartsu ikusten baitzaio. Larunbatean Peña II.ak bere lehen partida jokatuko du ligaxkan, eta Zabala izango du aurkari Labriten. Igandean Jakaren txanda izango da, eta Laso izango du aurrez aurre Ogeta pilotalekuan.