Tolosaldeko kontsumo bulegoak ohartarazi du eskualdeko butano-bonbona banatzailea dagokiona baino prezio altuagoan ari dela bonbonak saltzen.
Ainhoa Orrantia kontsumo bulegoko arduradunak esan duenez, adineko herritarrekin izandako hainbat kasu helarazi dizkiete. Orrantiak argi utzi du butano-bonbonaren prezioa Espainiako Gobernuak ezartzen duela, eta bi hilabetez behin eguneratzen duela. Prezio hori BOEn argitaratzen da. Bada, bonbonen salmenta prezioak ezin du aldizkarian argitaratutakoa baino handiagoa izan.
Bestalde, kontsumo bulegoko arduradunak azaldu du banatzaileak dagokiona baino prezio handiagoan saltzeaz gain, ez duela ordainagiririk ematen.
Butano-bonbona erostera doazen herritarrei adi egoteko eskatu die kontsumo bulegoak: «batetik, ondo begiratu dezatela prezioa, eta bestetik, eskatu dezatela ordainagiria».