Gipuzkoako Foru Aldundiak amaitu ditu Berrobiko zeharbidean (GI-2130) segurtasuna handitzeko eta irisgarritasuna hobetzeko urtarrilaren erdialdean hasitako lanak. Lanei esker trafikoa motelduko dute, oinezkoen mugikortasuna erraztu, eta errepidea herrigunean modu seguruago eta integratuagoan txertatuko dute.
Felix Urkola Bide Azpiegituretako eta Lurralde Estrategiako diputatua izan da Berrobin eta esan du «lanak errepidea herritarren eta herriaren beharretara egokitzeko helburuarekin» egin dituztela, segurtasuna indartuz eta elkarbizitza ahalik eta gehien erraztuz. Esku-hartzea Foru Aldundiaren tokiko ekintzen planaren barruan kokatu dute, herriguneetatik igarotzen diren errepide eta zeharbideetan segurtasuna eta bizikidetza hobetzea helburu duten lanen barruan. Hala, Foru Aldundiak 210.000 euro bideratu ditu lan horietara.
