Joan den ostiralean jokatu zen Alegiako Gaztetxean Gipuzkoako Herriarteko Bertsolari Txapelketaren lehen faseko Tolosaldeko bigarren finalerdia. Boskatu eta Aiztondo taldeak aritu ziren kantuan, maila bikainean, eta saio polita osatu zuten. Azkenean, alegiarrak gailendu ziren, eta martxoaren 27ko eskualdeko finalerako txartela eskuratu zuten.
Berastegiko Beasti taldea izango da aurkaria. Martxoaren 6an Tolosako Hiru tabernan Tolosaren aurka jokatutako finalerdia irabazita sailkatu ziren finalera berastegiarrak. Ikusmina piztu du herriarteko txapelketak, eta herritarren erantzuna bikaina izan da finalerdietako bi saioetan.
Esan bezala, martxoaren 27an izango da finala, Tolosako Alondegia tabernan. 22:00etan hasiko da, eta saioaren amaieran jakingo da zein izango den aurtengo herriarteko txapelketako Tolosaldeko talde ordezkaria hurrengo fasean. Finaleko talde irabazleak apirilean izango du hurrengo saioa, Goierriko talde ordezkariaren aurka: Zumarraga-Urretxu 1.
