Errigorak udaberriko kanpaina jarri du martxan. Eskutik Eskura egiten dugu herria lelopean, Nafarroa erdi eta hegoaldeko oliba-olio, kontserba, arroza, lekale eta ardoak eskuratu ahalko dira, euskaraz etiketatuta eta ekoizlearen jatorrizko prezioan. Martxoaren 18ra arte iraungo du kanpainak.
Aurtengo edizioa «are bereziagoa» egingo duen dinamika bat jarri dute, «kontsumitzaileengan hausnarketa eragiteko asmoz». Horretarako, Eragin saskiari! izeneko emankizun berezia sortu dute, Asisko Urmeneta marrazkilariaren parte hartzearekin. Martxoan zehar sei geltoki izango ditu dinamikak, eta bakoitzean ondorengo galderari erantzun beharko diote herritarrek: «Zergatik eragin behar dugu herritarrok gure elikaduran?». Bildutako hausnarketak batu ostean, behin kanpaina pasata, Errigorak kontsumitzaileen hausnarketa-kolektibo bat kaleratuko du. Horrek kontsumitzaile gehiagoren kontzientzia-hartzea bultzatuko duela uste dute.
Esku-eskura
Kanpaina honetan ere esku-eskura izango dituzte Errigorako produktuak herritarrek. Izan ere, Tolosaldeko 18 herritan jasoko dira produktuak: Abaltzisketa, Aduna, Alkiza, Altzo, Amasa-Villabona, Amezketa, Anoeta, Asteasu, Berastegi, Berrobi, Ibarra, Ikaztegieta, Irura, Larraul, Lizartza, Orendain, Tolosa eta Zizurkil.
Ordainketa egiteko hiru modu daude: kreditu txartelarekin, Bizum bidez edo eskudirutan. Ordainketa txartel bidez eginez gero, 150 eurotik gorako ordainketak bi zatitan egiteko aukera egongo da (erdia eskaera egiterako garaian eta beste erdia apirilean). Eskudirutan eginez gero, produktuak jasotzerakoan ordaindu beharko da.