Txapelketa asteburuan jokatu zen Valentzian (Herrialde Katalanak). John Cabang izan zen txapelketako izarra, atleta onenaren saria jaso baitzuen. 60 metro hesietan lehen postua lortu zuen, eta txapelketako errekorra ezarri zuen 7,70ko denborarekin. 60 metroko proban ere parte hartu zuen Cabangek, eta 6,95eko marka egin zuen. Bertan aritu zen ere Joseba Larrauri, eta 6,92ko marka lortu zuen. Larraurik 200 metroko proban ere parte hartu zuen, eta 21,84ko marka egin zuen. Ander Martinez de Rituertok pertika jauzian hartu zuen parte, eta hirugarren postua lortu zuen 5,20 metroko jauziarekin, denboraldiko bere marka onena izanik.
Atletek bihar omenaldia jasoko dute Anoeta estadioan, gizonezkoen Reala eta Real Oviedo taldeen arteko futbol partidaren aurretik. Gainera, atletek ohorezko sakea egingo dute.