Zinemaldian ikusi ahal izan zen Arg(h)itzen: Torturaz argi hitz egiten, tortura argitzen dokumentala ekarriko dute Tolosara. Datorren hilaren 28an, asteazkena, ikusi ahal izango da Tolosako kultur etxean, Tolosaldeko Torturatuen Sarearen eskutik.
Dokumentalak Euskal Herrian bizi izandako tortura kasu «sistematikoen» errealitatera gerturatzeko aukera ematen duela esan dute. 1966 eta 2011 urteen artean Sakanako eskualdean torturak jasan zituzten 30 pertsonen testigantzak jasotzen ditu kontakizun «zorrotz eta dinamiko» baten bidez. «Tortura zer den eta nola gaindi daitekeen erakusteaz gain, Estatuaren zigorgabetasun-egiturak ere erakusten ditu adituen bitartez», azaldu dute. Mikelatxo Urbi taldeak auzolanean egindako lana da, eta torturaren egia argitara ateratzea eta tortura erabat desagerrarazteko bidea egitea ditu helburu.