Sinadura bilketa, azken hilabete honetako itxialdia eta Gasteizko nahiz Iruñeko manifestazioari aipamena egin ondoren, Eusko Jaurlaritzaren jarrera salatu dute, herri ekimenari muzin egiteagatik. Aurrera begira, astelehenero mobilizatzen jarraituko dutela iragarri dute. Hurrengo hitzordua Villabonan izango da, urtarrilaren 12an. Horrez gain, Hego Euskal Herrian LAB eta ELA sindikatuek deitutako greba egunarekin «guztiz» bat egin dute, gutxieneko soldataren aldarrikapena, gutxieneko pentsioaren aldarrikapenaren parekidea delako. Greba eguna, martxoaren 17an izango da.