Ibarratik Misio Taldea Ibarrako San Bartolome parrokian elkartzen diren zenbait boluntariok osatzen dute; Gobernuz Kanpoko Erakundea da. Eta helburua beharra dutenei laguntzea da. Indian, Hondurasen eta Ekuadorren kokatuta ditu bere zeregin nagusiak misio taldeak. Larunbatean, horien berri eman eta proiektuak aurrera eramaten jarraitzeko herrialde horietako produktuak saltzen ariko dira Tolosako Udalak antolatu duen Gabonetako Azoka Berezian. Hala, San Frantzisko pasealekuan izango dira, 10:00etatik 14:00etara.
Honduras, Ekuador eta Indiako gizartea laguntzen dute. Besteak beste, haurrak babestea, oinarrizko azpiegiturak eraikitzea, emakumeen ahalduntzerako baliabideak eskaintzea, eskolak eta barnetegiak eraikitzea, kooperatibak sortzen laguntzea, kalean bizi diren neskentzat harrera etxeak sortzea eta mantentzea eta oinarrizko osasuna sustatzeko baliabideak lortzea.